ایف آئی اے امیگریشن نے کراچی ایئرپورٹ پر کارروائی کرتے ہوئے مشکوک ای ویزا پر البانیہ جانے والے مسافر کو 2 ایجنٹوں سمیت گرفتار کرلیا۔
ایف آئی حکام کے مطابق مسافر مرزا سکندر کی جانب سے پیش کیا جانے والا البانیہ کا ای ویزا جعلی نکلا۔
ابتدائی تفتیش میں انکشاف ہوا کہ مسافر نے جعلی ویزا ایجنٹوں سے 22 لاکھ روپے کے عوض حاصل کیا، ملزم نے 15 لاکھ روپے بینک کے ذریعے ادا کیے، مسافر کی نشاندہی پر ایف آئی اے امیگریشن نے فوری کارروائی کرتے ہوئے راجہ مہران خالد اور شہروز جنید کو کراچی ایئرپورٹ سے گرفتار کر لیا۔
ایف آئی اے نے ملزم کی نشاندہی پر ایجنٹ مہران خالد اور شہروز جنید کو ایئرپورٹ کے احاطے سے گرفتار کرلیا، تینوں ملزمان کو ایف آئی اے اینٹی ہیومن ٹریفکنگ سرکل منتقل کردیا گیا۔
