وزیراعظم شہباز شریف نے کہا ہے کہ پولیس افسروں اور اہلکاروں کا اصل امتحان میدانِ عمل میں ہوگا جہاں عام آدمی کو انصاف فراہم کرنا ہے۔
تفصیلات کے مطابق وزیر اعظم شہباز شریف نے اسلام آباد میں نیشنل پولیس اکیڈمی کا دورہ کیا ،جہاں انہوںنے پولیس افسران اور جوانوںکی پاسنگ آؤٹ تقریب سے خطاب کیا۔
نیشنل پولیس اکیڈمی میں خطاب کرتے ہوئے وزیراعظم نے کہا کہ عام انسان کی جان و مال کی حفاظت کرنی ہے، اہداف کا حصول تبھی ممکن ہے جب تربیت اور بہترین سہولیات کو یقینی بنایا جائے گا، نیشنل پولیس اکیڈمی میں معیاری تربیت، بہترین رہائش اور اچھی سہولیات کا انتظام ہو گا۔
انہوں نے کہا کہ پولیس میدان عمل میں بھرپور کردار ادا کر رہی ہے، پولیس اکیڈمی سے تربیت کے بعد میدان عمل میں شہریوں کو انصاف دینا ہے۔
محمد شہباز شریف نے بتایا کہ بطور وزیراعلیٰ پنجاب ایلیٹ فورس کا قیام عمل میں لایا جس کا مقصد ایلیٹ کا تحفظ نہیں بلکہ معاشرتی برائیوں کوختم کرنا ہے، انسداد دہشت گردی ڈیپارٹمنٹ کا قیام عمل میں لائے اور لاہور میں فرانزک لیب قائم کی، پنجاب پولیس میں 100 فیصد میرٹ پر بھرتیاں کیں جس کے بعد سب اداروں نے مل کردہشت گردی کے خاتمے میں کردار ادا کیا۔
اپنے خطاب کے دوران وزیراعظم نے پولیس اہلکاروں کی قربانیوں کو خراج تحسین پیش کرتے ہوئے کہا کہ دریائے جہلم میں ایک پولیس جوان نے شہریوں کی جان بچاتے ہوئے شہادت پائی، وطن کی آبیاری اور فرض کی ادائیگی کے لیے پولیس کے جوان اپنی جانوں کا نذرانہ دے رہے ہیں۔
شہباز شیرف کا کہنا تھا کہ سکیورٹی ادارے دہشتگردی کیخلاف سر گرم ہیں، ملک میں دہشتگردی نے دوبارہ سر اٹھایا ہے سکیورٹی اہلکار دہشتگردی کیخلاف جنگ میں جانوں کے نذرانے پیش کر رہے ہیں۔
اس سے قبل وفاقی وزیر داخلہ محسن نقوی نے پاسنگ آؤٹ پریڈ سے خطاب کرتے ہوئے کہاکہ ایک سال پہلے اکیڈمی کی حالت بہت خستہ تھی، اکیڈمی میں کوئی سٹاف ممبرنہیں تھا اور یہ ڈمپنگ سٹیشن بن چکی تھی، وزیراعظم سے اکیڈمی کی تزئین و آرائش سے متعلق بات کی ہے۔
انہوں نے کہا کہ پاکستان ملٹری اکیڈمی کی طرز پر پولیس اکیڈمی اور تربیت کا معیار بہتر بنائیں گے، اس اکیڈمی میں دوسرے ممالک کے لوگ تربیت کے لیے آتے تھے۔
وفاقی وزیر داخلہ نے مزید کہا کہ اکیڈمی میں اقوام متحدہ اپنا پروگرام شروع کرے گی، سائبرکرائم، کریمنالوجی جیسے جدید کورسز متعارف کرائے جائیں گے، تربیت دینے والے افسران کو مناسب تنخواہیں دی جائیں گے۔
نیشنل پولیس اکیڈمی میں 52ویں کامن بیچ کی پاسنگ آؤٹ پریڈ ہوئی، جس میں 43 افسران نے تربیت مکمل کی، جن میں 9 خواتین افسران بھی شامل ہیں، تقریب میں وفاقی وزیر اطلاعات عطا اللہ تارڑ اور وزیر مملکت داخلہ طلال چوہدری بھی شریک ہوئے۔
