کراچی کے علاقے نیا ناظم آباد کے قریب ٹینکر کی ٹکر سے شہری جاں بحق ہوگیا۔
پولیس حکام کا کہنا ہے کہ ڈرائیور ٹینکر چھوڑ کر فرار ہوگیا، ٹینکر تحویل میں لے لیا گیا، واقعہ سے متعلق مزید معلومات حاصل کی جا رہی ہیں۔
اس حادثے کے بعد رواں سال ٹریفک حادثات میں جاں بحق افراد کی مجموعی تعداد 221 ہوگئی جبکہ ہیوی گاڑیوں کا نشانہ بن کر جاں بحق افراد کی تعداد 70 ہوگئی ، متوفی کی لاش ضابطے کی کارروائی کے لیے عباسی شہید اسپتال منتقل کی گئی۔
اس حوالے سے ایس ایچ او منگھوپیر عمران خان نے بتایا کہ متوفی کی شناخت 35 سالہ محمد ابراہیم خان کے نام سے کی گئی ، حادثے کا ذمہ دار ڈرائیور موقع سے فرار ہوگیا تاہم پولیس نے واٹر ٹینکر کو اپنے قبضے میں لیکر تھانے منتقل کر دیا جبکہ ڈرائیور کی تلاش میں پولیس چھاپے مار رہی ہے۔
متوفی کے محلے دار نفیس نے بتایا کہ ابراہیم خان مسجد کا خطیب اور حافظ قرآن تھا جو کہ پختون آباد گلی نمبر 13 کا رہائشی اور 2 بچوں کا باپ تھا ، متوفی کا آبائی تعلق کے پی کے سے ہے جبکہ وہ تراویح کے بعد چائے پینے کے لیے موٹر سائیکل پر نکلا تھا کہ جان لیوا حادثے کا شکار ہوگیا۔
