سابق وزیر ہوا بازی کے جرائم میں بانی پی ٹی آئی برابر کے شریک تھے: خواجہ آصف

وزیر دفاع خواجہ محمد آصف نے کہا ہے کہ پاکستان کا نام برطانیہ کی ایئر سیفٹی لسٹ سے نکالا جانا اہم سنگ میل ہے،سابق وزیر ہوا بازی کے جرائم میں بانی پی ٹی آئی برابر کے شریک تھے۔ اسلام آباد میں پریس کانفرنس کرتے ہوئے خواجہ آصف نے کہا کہ سابق وزیر ہوا بازی کے اقدامات سے پاکستانی ایئر لائنز پر پابندیاں لگی تھیں، غلام سرور خان نے اپنے ادارے کے خلاف جو جرم کیا وہ قومی جرم تھا، بانی پی ٹی آئی اور غلام سرور نے قومی ایئر لائن کو قبرستان بنایا۔ پی ٹی آئی دور حکومت میں ہوا بازی کے وزیر نے اپنے ہی ادارے پر الزام لگایا، پی ٹی آئی دور کے وزیر کے غیر ذمہ دارانہ بیان کے باعث یہ پابندی لگی تھی۔ انہوں نے کہا کہ پی ٹی آئی دور کے وزیر ہوا بازی کے غیر ذمہ دارانہ بیان سے قومی ایئرلائن کو اربوں روپے کا نقصان پہنچا، غیر ذمہ دارانہ بیان سے قومی وقار بھی مجروح ہوا، ان کا غیر ذمہ دارانہ بیان ریاست کیخلاف مجرمانہ اقدام تھا، انہوں نے اپنے غیر ذمہ دارانہ بیان کی آج تک کوئی وضاحت نہیں دی، پی آئی اے پر پابندی کی ذمہ داری پی ٹی آئی پر بھی عائد ہوتی ہے۔ یہ بھی پڑھیں:برطانیہ نے پاکستان کو بڑی خوشخبری سنا دی ان کا کہنا تھا کہ اوورسیز پاکستانیوں کی اکثریت پی آئی اے کے ذریعے سفر کرتی ہے، پابندی کے خاتمے سے برطانیہ میں مقیم پاکستانیوں کو سہولت میسر آئے گی۔ خواجہ آصف نے کہا کہ پابندی ختم ہونے کا فائدہ پی آئی اے کی نجکاری میں بھی ہوگا، اگلے مرحلے میں پی آئی اے کی نجکاری کرنے جا رہے ہیں، پی آئی اے کے انٹرنیشنل روٹس بحال کر کے نجکاری کریں گے، عالمی ریگولیٹرز کے شکر گزار ہیں جن کی رہنمائی سے سنگ میل عبور کیا، وزیراعظم شہباز شریف نے پی آئی اے کے روٹس کی بحالی کے معاملے میں ذاتی دلچسپی لی۔